Qaysi yerda chivin yoʻq

Burungi zamonda Husayn Boyqaro degan podsho yashagan ekan. U vaziri Sheraliga:

— Qaysi yerda chivin boʻlmaydi? — deb savol beribdi. Sherali oʻylanmasdan:

— Odam yoʻq yerda chivin boʻlmaydi, — deb javob beribdi.

Shunday qilib, bular ikkisi otga minib, odam yoʻq yerlarni qidirib ketishibdi. Yoʻl yurib, yoʻl yursalar ham moʻl yurib bir sahroga chiqishibdi. Shu yerda bir oz dam olmoqchi boʻlib oʻtirishibdi.

Sherali choy qaynatibdi, ikkisi choy ichib oʻtirgan vaqtida bir chivin «viz» etib Husayn Boyqaroning piyolasi yonidan oʻtib, etagiga qoʻnibdi. Husayn Boyqaro aytibdi:

— Sherali, odam yoʻq yerda chivin boʻlmaydi degan eding, mana bu yerda chivin uchib yuribdi-ku, — debdi. Sherali:

— Ha, siz bilan biz odam emasmizmi? — deb javob beribdi. Husayn Boyqaro Sheraliga kissasidan ming tilla chiqarib berib:

— Barakalla, yengding meni, — debdi.