Podsho bilan ikki xotin

Bir bor ekan, bir yoʻq ekan, bir podsho bor ekan. U birinchi xotinining ustiga oʻz vazirining qizini xotinlikka olibdi. Vazirning qizi juda zahar ekan. U hadeganda kundoshi bilan urishaverib, hech kun bermas ekan.

Bir kuni ularning urishib turganlari ustiga podsho kelib qolibdi. Ayb kichik xotinida ekan, shunga qaramay, podsho unga tegmabdi. Aybsiz boʻlsa ham, katta xotinini tutib olib, rosa kaltaklabdi. Kichik xotin kundoshidan qutilish payiga tushibdi.

— Xotiningni oʻldirmasang, men senga xotin boʻlmayman, — deb turib olibdi kichik xotini. Podsho nima qilishini bilmay, vaziridan maslahat soʻrabdi. Vazir:

— Podshohim, “yana urishganlaringning ustidan chiqqudek boʻlsam, ikkovingga ham jazo beraman», — deng, xizmatkorlaringizga esa, katta xotiningizni qorga koʻmishga, kichik xotiningizni unga koʻmishga buyruq bering. Shunda katta xotiningiz qor tagida, sovuqda qotib oʻladi, siz qutulasiz, — deb maslahat beribdi.;

Podsho bir kuni yana xotinlarining urishayotgani ustidan chiqib, xizmatkorlariga:

— Olib boring, birini qorga, birini unga koʻming, — deb buyruq beribdi.

Xizmatkorlar podshoning buyrugʻini bajo keltirib, katta xotinini qorga, kichik xotinini unga koʻmib qoʻyishibdi. Bir ozdan keyin ochib qarasalar, un tagiga koʻmilgan vazirning qizi oʻlib qolgan, qor tagiga koʻmilgan katta xotin oʻlmay qolgan ekan.