Oʻjarvoy bilan vafodor it
Bir bor ekan, bir yoʻq ekan, bir daryoning boʻyida chol bilan kampir yashagan ekan. Ularning yakka-yu yagona, koʻzlarining oqu qorasi, keksayganda koʻrgan erkatoy bir oʻgʻillari bor ekan.
U juda ham shoʻx boʻlgani uchun unga Shoʻxvoy deb ism qoʻyishgan ekan. Lekin keyinchalik qaysar, oʻjar, oʻzining aytganidan qolmaydigan boʻlgani uchun bolani Oʻjarvoy deb chakiradigan boʻlishibdi. Shu-shu bolaning ismi Oʻjarvoy boʻlib qolibdi. Oʻjarvoyning ziyrak va sezgir bir iti bor ekan.
Kunlardan bir kun Oʻjarvoy ertalab oʻrnidan turib, daryoda bet-qoʻlini yuvib kelmoqchi boʻlibdi.
Kampir esa:
— Iliq suv qilib qoʻyganman. Shu yerda bet-qoʻlingni yuvgin, — debdi.
Oʻjarvoyga bu gap yoqmabdi. U oʻz aytganida turib olibdi. Chol-kampirdan yashirib, oʻzi daryo qirgʻogʻiga boribdi. Sochiq bilan sovunlarini bir yoniga qoʻyibdi. Orqasiga qarasa, iti ham unga ergashib kelgan ekan. Oʻjarvoy qirgʻoqqa yaqinlashibdi. Oʻjarvoy bir necha bor suvga engashibdi. Lekin hech boʻyi yetmabdi. Pastroq joyni qidiribdi. Qidirib-qidirib oxiri topibdi. Qoʻli suvga yetay-etay deganda suv birdan pastlashib ketibdi. Shunda daryodagi suv tilga kirib:
— Ey, bola, sen uyingga qaytib borgin-da, oʻsha yerda yuvingin. Daryo suvi sendaqa oʻjar bolalarga suv bermaydi, — debdi.
Daryodagi suv birdan yana toʻlqinlanib, yanada pasayib ketibdi. Oʻjarvoy hayron boʻlib qolibdi. Lekin baribir hech uyiga ketgisi kelmabdi. Oʻjarvoy karab tursa, daryo suvi yana asliday oqa boshlabdi. Oʻjarvoy yana qoʻlini suvga uzatibdi, suv yana kamayib ketibdi. Uchinchi marta ham qoʻlini choʻzganda xuddi shunday boʻlibdi. Toʻrtinchi marta suvga intilganida, kallasi bilan suvga shoʻngʻib kirib ketibdi. Buni koʻrgan it oʻzini suvga otibdi. Choʻkib ketayotgan Oʻjarvoyning koʻylagidan tishlab sudrab chiqaribdi.
Shunday qilib, Oʻjarvoy bilan vafodor it uyga arang yetib kelishibdi. Oʻjarvoy boʻlgan voqeani chol bilan kampirga aytib beribdi. Ular Oʻjarvoyni urishib, itning qilgan ishidan quvonishibdi. Shundan keyin Oʻjarvoy ota-onasiga oʻjarlik qilmaslikka soʻz beribdi.
Oʻjarvoy shunday qilib oʻjarligini tashlagan ekan.
