Ikki echki

Ikki qaysar echki boʻlgan ekan.

Kunlardan bir kuni ikkalasi anhor ustidagi yakka choʻp koʻprik ustida uchrashib qolishibdi. Ikkisidan biri yul berishi kerak ekan.

— Yoʻl ber! — debdi biri.

— Sen yoʻl ber! — debdi ikkinchisi.

— Seni deb orqamga qaytamanmi? — debdi birinchisi.

— Boʻlmasa seni deb men orqamga qaytamanmi? — debdi ikkinchisi.

Shunday qilib ikkalalari achchiqlanib, suzishib ketishibdi.

Keyin birinchi echki uch qadam, ikkinchi echki uch qadam orqaga qaytib, birdan bir-birlariga hamla qilishibdi. Shoxlari shoxlariga tegib, chaqmoq chaqqandek boʻlibdi.

«Qars» etgan ovoz dalani tutibdi.

Ikki echki yumaloq-yostiq boʻlib anhorga agʻdarilib ketibdi.