Ikki donishmand

Kunlardan bir sovuq kunda bir podsho bir donishmand chol bilan yoʻlda ketayotsa, bir kishi yer haydayotgan ekan. Shunda donishmand chol haligi kishiga:

— Toʻqqizni uchga bermabsiz-da, inim, — debdi. Haligi kishi esa:

— Toʻqqizni uchga beray desam, oʻttiz oltilikdan ortmayapti-da, — debdi.

Podsho bilan donishmand chol bir joyda toʻxtashganda, podsho undan soʻrabdi:

— Siz boya nega «toʻqqizni uchga bermabsiz-da», deb haligi kishidan soʻradingiz? U esa «oʻttiz oltilikdan oshmayapti» dedi. Siz nima degan edingiz-ku, u nima deb javob qaytardi?

Donishmand:

— Men «toʻqqiz oy ishlab, uch oy shu ishlaganingizni yeb yotmaysizmi» deb soʻradim. U esa «toʻqqiz oy ishlab uch oy yeb yotay desam, oʻttiz olti tishlik bola-chaqamdan ortmayapti», deb javob qaytardi, — debdi.

Podsho ikki donishmandning savol-javobiga qoyil qolibdi.