Eshagim yosh edi

Xonlarning zulmini, qiyinchilikni koʻp koʻrgan bir kambagʻal yurtga podsho boʻlib qolibdi. Oldiga arzi-dodga kelgan fuqarolarni sipohlar kirishga qoʻymay, ular qaytib ketib qolmasinlar deb, qopugʻ oldiga shildiraydigan temirlarni osib tashlagan ekan. Sal shildirashi bilan ogoh boʻlar ekan.

Kunlardan bir kuni temir shildirab ketibdi. Sipohlar qarasa, bir eshak ilinib qolibdi.

— Ey podsho, shildiratayotgan eshak ekan, — debdi sipoh. Podsho:

— Egasini topinglar! — debdi. Egasini topib soʻrashgan ekan. Egasi:

— Eshagim yosh edi, ish berganida yaxshi ishlatdim. Qariganida ishga yaramay qoldi, haydab yubordim, — debdi. Adolatli podsho eshakni egasiga topshirib:

— Yoshligida kuchidan foydalanding, qariganida ham yaxshi boq, — debdi.