Bulbul bilan qarqunoq

Qadim oʻtgan zamonda bir kishi ikki parrandaga — bulbul bilan qarqunoqqa soʻz oʻrgatibdi. Bulbul bitta soʻz oʻrganibdi, qarqunoq esa qirqta soʻz oʻrganibdi. Kunlardan bir kuni qarqunoq bilan bulbul uchrashib qolishibdi. Bulbul qarqunoqdan soʻrabdi.

— Soʻz oʻrgandingmi?

— Ha, — debdi qarqunoq. — Bir emas, qirqta soʻz oʻrgandim.

— Qani, oʻrgangan soʻzlaringni bir aytib koʻrchi, debdi bulbul. Qarqunoq qirqta soʻzining hammasini birma-bir sanab chiqibdi.

— Sen ham soʻz oʻrgangandirsan? — soʻrabdi qarqunoq oʻz navbatida bulbuldan.

— Boʻlmasam-chi, — deb javob beribdi bulbul. — Men qirq bitta soʻz bilaman.

Bulbul bittasini biladigan soʻzi yoniga hozirgina qarqunoqdan oʻrganib olgan qirqta soʻzini qoʻshib sanab beribdi. Shunday qilib bulbul bulbuligoʻyo boʻlib bogʻ-rogʻlarga kirib ketibdi. Qarqunoq boʻlsa, afsuslanib dasht-u sahrolarga chiqib ketibdi.