Ayyor tulki

Kunlardan bir kuni bir tulki ovga chiqibdi. U biror joydan oʻlja topa olmabdi. Tulki xafa boʻlib qaytayotganda yerda bitta konfet yotganmish. Sevinganidan konfetni yeb, qogʻozini peshonasiga yopishtirib olibdi. Shundan soʻng bir toʻda tulkilarning oldiga borib debdi:

— Ey birodarlar, endi hech qoʻrqmanglar. Men hammamiz uchun, umrbod erkin yashash uchun merganlardan qogʻoz oldim. Uni merganlarning oʻzi peshonamga tamgʻa qilib bosdi. Toʻrtta tulki bamaslahat:

— Endi erkin boʻldik-da, — deyishibdi. Ikkinchisi esa:

— Boʻlmasa bu kecha ovga joʻnaylik, — desa, yana bittasi:

— Shu kecha mana shu qishloqni talaymiz, — deb toʻrt tulki oʻynab-oʻynab ketayotganlarida, merganlar allaqachonlar bu tulkilarni nishonga olgan ekanlar. Merganlarning tozi itlari tulkilarni oʻrab olibdi. Ovchilar ularni tiriklayin qoʻlga tushiribdi. Toʻrtta tulki: Qani, sen unday degan eding deyishibdi. Qogʻoz yopishtirgan tulki:

— Qanday degan edim. Xuddi ana shunday boʻlamiz degan edim, — debdi.