Aldarkoʻsa va boy

Bir kuni Aldarkoʻsa yoʻlda ketayotsa, uning oldidan boy chiqib qolibdi. U Aldarkoʻsaga:

— Hoy Aldarkoʻsa, qani meni bir aldab koʻr-chi, qoʻlingdan kelarmikan? — debdi. Aldarkoʻsa qarasa boy juda takabbur koʻrinadi. Aldarkoʻsa «buni qanday qilib aldasam ekan, quruq aldasammikan yoki hoʻl aldasammikan», deb oʻylanib turibdi-da:

— Boy ota, aldar edimu hozir kayfim yoʻqroq, — debdi.

— Nega kayfing yoʻq? — debdi boy.

— Bir odamdan uch tanga olgan edim, shu taʼbimni xira qildi.

— Mana, senga yeb ketarga uch tanga. Qani, endi aldab qoʻyasanmi? — deb boy unga pul tutqazibdi.

— Rahmat sizga, boy ota, men mana bu pulni haligi nokastaga berib, kelishda aldar xaltamni olib kelaman. Ana undan keyin hangomani koʻrasiz, — deb Aldarkoʻsa joʻnab ketibdi.

Boy uni yetti xuftongacha kutibdi, kelmabdi. Shundan keyingina aldanganini bilibdi.